Departman Lanplwa pou envit sa de lakonpannyen pour vin donn detay lo fason zot fer rekritman

Gouvernman Sesel pou tre byento envit sa de lakonpannyen Bangladeshi ki responsab pour rekrit travayer sorti dan sa pei pour vin travay Sesel pour zot vin eksplike ki mannyer zot fer rekritman e avek ki vites pour ki napa dele.

Avek sinyatir en lakor bilateral ant gouvernman Sesel ek gouverman Bengladesh pour etabli en lankadreman legal pour rekrit travayer sorti dan sa pei, tou lakonpannyen oubyen biznes ki anrezistre e ki anvi rekrit travayer sorti Bengladesh i bezwen pas atraver de lakonpannyen rekritman selman ki baze dan sa pei e sa se Bangladesh Overseas Employment and Services Ltd (BOESL) e Bureau of Manpower, employment and Training (BMET).

Yer bomaten plizyer responsab ou reprezantan bann lakonpannyen oubyen biznes ki deza pe anploy travayer Bengladeshi oubyen bann ki pe mazin rod servis sa bann travayer ti asiste en miting konsiltativ organize par Departman Lanplwa pour ganny plis detay lo sa bann nouvo prosedir rekritman.

Apre Praslin ek La Digue semenn pase kot sekreter prensipal pour lanplwa Msye Jules Baker ek lezot zofisye dan Departman Lanplwa osi byen ki Imigrasyon ek Leta Sivil ti donn detay bann anplwayer lo sa de zil lo sa bann nouvo prosedir pour rekrit sa bann travayer, yer zot in fer menm parey isi lo Mahé.

Msye Baker in dir ki zot ekspekte ki pou annan serten pti difikilte pour konmanse dan lenplimantasyon sa bann nouvo prosedir e sa i akoz pa tou keksoz ki depan lo gouvernman Sesel me pou osi depan lo gouvernman Bengladeshi sirtou sa de lakonpannyen rekritman.

Apre en prezantasyon PowerPoint lo bann nouvo prosedir pour rekrit travayer sorti Bengladesh fer par direkter pour migrasyon travayer etranze, Manmzel Vanessa Dugasse, Msye Baker ek lezot zofisye Minister Lanplwa, Imigrasyon ek Leta Sivil ti asiz lo en panel pour reponn kestyon e klarifye bann dout ek konfizyon sorti kot bann ki ti prezan.

Nou ava rapel ki sa bann nouvo prosedir rekritman in vin anfors swivan lakor bilateral ki gouvernman Sesel avek gouvernman Bengladesh ti sinyen isi mwan pase apre bokou diskisyon ant bann o zofisye lanplwa le de pei.

Sa bann nouvo prosedir ki toulede pei in dakor lo la i met lanfaz lo laplikasyon pour rekritman, konteni kontra lanplwa, fre transportasyon ek bann depans ki sa anplwayer e osi sa travayer pou fer, akomodasyon, e tou sa ki annan pour fer avek son rapatriman.

Msye Baker i dir sa bann nouvo prosedir atraver sa lakor in neseser pour met keksoz annord e dan en kad legal apre ki gouvernman Bengladesh in eksprim konsern lo fason son bann sitwayen ki al travay dan bann diferan pei enkli isi ti pe ganny rekrite e move tretman ki zot ti pe sibir par serten zot bann anplwayer e bann diferan problenm ki ti pe arive kot sa bann travayer ti vin rod rekour kot biro Departman Lanplwa ou menm fer manifestasyon piblik.

“Nou konman en pti pei nou annan loportinite pour rekrit travayer Bengladeshi e nou bezwen fer li byen e pour anpese ki Sesel i ganny servi konman en destinasyon pour lesklavaz modern e osi pour trafik imen” Msye Baker in dir.

I’n fer resorti ki avek en bon lankadreman sa i ava anpese ki Departman Lanplwa i bezwen entervenir pour rezourd bann problenm ki pa li ki’n kree, ki bann anplwayer i ava ganny bann travayer ki i ti pe rode e non pa lekontrer e ki sa lakonpannyen rekritman i ava pran responsabilite pour tou sa bann keksoz vi ki li ki pou’n legalman rekrit sa bann travayer.

Parmi bann pwen pertinan ki bann ki ti prezan ti fer resorti ti nesesite pour sa bann travayer ganny kouver par en lasirans peye par zot gouvernman, nesesite pour kapab modifye sa bann prosedir, fre ki tonb lo anplwayer letan en travayer ki ganny rekrite i vin avek en maladi dan plas vin fit pour travay, si Departman Lanplwa i annan manda pour enterfer e get dan kalite akomodasyon kot sa bann travayer pou reste.

I annan ki ti anvi konnen akoz ki gouverman i met konfyans dan sa de lakonpannyen rekritman, problenm ki annan pour fer avek allowance pour manze ek transportasyon.

Lo sa bann pwen Msye Baker ti dir ki lasirans i bezwen kouver par son anplwayer me en komite konzwent etabli anba sa lagreman pou diskit tou sa bann pwen konsern ki leve e sa size lasirans i kapab anmenn devan avek gouvernman Bangladesh pour diskisyon ek konsiderasyon.

Lo size akomodasyon, Msye Baker ti fer resorti ki Departman Lanplwa napa manda pour enterfer dan kalite akomodasyon me i annan manda pour asire ki travayer etranze ki vin travay Sesel i reste e dormi dan en landrwa ki konfortab konman en travayer e en imen.

Lo size lozman, manze ek transportasyon Msye Baker i dir bann anplwayer i bezwen detay tou keksoz klerman dan kontra ki zot fer avek sa bann travayer.

An sa ki konsern konfyans ki gouvernman i annan dan sa de lakonpannyen rekritman, Msye Baker i dir gouvernman i krwar dan kapasite sa de lakonpannyen e i pa la pour met blokaz dan prosedir ek prosesis fer biznes Sesel e si i annan okenn blokaz Departman Lanplwa ava travay ek sa de lorganizasyon pour diskite e fer keksoz bouze.

Ti annan bokou lezot pwen ki ti leve lo sa size rekritman ek son bann nouvo prosedir.

Marie-Anne Lepathy